لیبارٹری پروفیشنلزحقیقی ہیروز، نظام صحت میں ریڑھ کی ہڈی کی حیثیت رکھتے ہیں:ڈاکٹر فریاد حسین
بیماریوں کی تشخیص اور مریض کے علاج میں لیبارٹری ٹیسٹ بنیادی اہمیت کے حامل ہوتے ہیں: ایم ایس
یہ شعبہ صرف تکنیکی نہیں بلکہ انسانی خدمت اور تحقیقی علم کا مجموعہ ہے:پروفیسر نازش ثقلین /پروفیسر فرحان رشید
یہ کام باریک بینی، توجہ اور سائنس کا متقاضی، مریضوں کی بہتری میں اہم کردار ادا کرتے ہیں: پروفیسر نثار احمد
جنرل ہسپتال میں میڈیکل لیبارٹری پروفیشنلز ویک 2025، خراج تحسین پیش،کیک کاٹا گیا
لاہور5مئی:……میڈیکل سپرنٹنڈنٹ لاہور جنرل ہسپتال پروفیسر ڈاکٹر فریادحسین نے لیبارٹری پروفیشنلز کو حقیقی ہیروز قرار دیتے ہوئے کہا کہ ان کی خدمات نظام صحت میں ریڑھ کی ہڈی کی حیثیت رکھتی ہیں جو پس منظر میں رہ کر انتہائی اہم کردار ادا کرتے ہیں اور بیماریوں کی تشخیص اور مریض کے علاج میں لیبارٹری ٹیسٹ بنیادی اہمیت کے حامل ہوتے ہیں۔انہوں نے کہا کہ یہ لوگ ہمارا وہ اثاثہ ہیں جنہوں نے کورونا وائرس کے دوران اپنی جانوں کی پرواہ کیے بغیر فرنٹ فٹ پر رہ کر اپنی خدمات سر انجام دیں جو قابل ستائش ہیں۔ لیب ٹیکنیشنز کا کام باریک بینی، توجہ اور سائنس کا متقاضی ہوتا ہے جو مریضوں کی بہتری میں اہم کردار ادا کرتے ہیں۔ایم ایس ڈاکٹر فریاد حسین کا کہنا تھا کہ پرنسپل امیر الدین میڈیکل کالج پروفیسر ڈاکٹر محمد الفرید ظفر نے سنٹرل ریسرچ لیب کو جدید خطوط پر استوار کرنے میں اہم کردار ادا کیا۔ جس سے نوجوان ڈاکٹرز بڑی تعداد میں مستفید ہو رہے ہیں۔
ان خیالات کا اظہار ایم ایس ایل جی ایچ نے پوسٹ گریجویٹ میڈیکل انسٹی ٹیوٹ، امیر الدین میڈیکل کالج اور لاہور جنرل ہسپتال میں شعبہ پتھالوجی کے زیر اہتمام میڈیکل لیبارٹری پروفیشنلز ویک2025کی منعقدہ تقریب سے خطاب کرتے ہوئے کیا۔ تقریب میں پروفیسر ڈاکٹر نثار احمد نے خصوصی طور پر شرکت کی جبکہ اس ایونٹ کے منتظمین شعبہ پتھالوجی کے سربراہ ڈاکٹر نازش ثقلین اور پروفیسر ڈاکٹر فرحان رشید تھے جبکہ شرکاء نے میڈیکل لیب اسٹاف کی خدمات کو سراہا۔ تقریب میں ہیلتھ پروفیشنلز کی کثیر تعداد موجود تھی۔
ڈاکٹر پروفیسر نثار احمد نے کہا کہ لیبارٹری پروفیشنلز کی لگن، درستگی،خاموش محنت، درست تشخیص اورموثر علاج ہی مریضوں کی سلامتی کی بنیاد ہے۔انہوں نے کہا کہ نمونوں کی جانچ سے لے کر ٹیسٹوں میں درپیش مسائل اور کوالٹی کنٹرول کویقینی بنانا براہ راست زندگیوں پر اثر انداز ہوتا ہے جوانتہائی اہمیت کا حامل ہے۔ پروفیسر ڈاکٹر نازش ثقلین نے کہا کہ آج کے دور میں تیز اور قابل اعتماد تشخیص پہلے سے کہیں زیادہ اہم ہو چکی ہے لہذا لیب پروفیشنلز اپنی پیشہ ورانہ مہارت، دیانت داری،محنت،اور لگن کے ساتھ ان تقاضوں کو بخوبی نبھا رہے ہیں۔ انہوں نے کہا کہ یہ پیشہ صرف ایک تکنیکی کام نہیں بلکہ انسانی خدمت اور تحقیقی علم کا مجموعہ ہے۔پروفیسر ڈاکٹر فرحان رشید نے لیبارٹری کے مختلف شعبوں میں کام کرنے والے تمام پروفیشنلز کا شکریہ ادا کیا اور کہا کہ آپ ہماری قوت ہیں اور روزانہ کی بنیاد پر مہارت، وابستگی سے ادا کیے جانے والی ذمہ داری کسی سے ڈھکی چھپی نہیں۔ تقریب کے اختتام پر میڈیکل لیب پروفیشنلز کے اعزاز میں کیک کاٹا گیا جس میں تمام شرکاء نے بھرپور جوش و خروش سے شرکت کی۔نیز لیبارٹری سٹا ف میں تعریفی اسناد و میڈلز بھی تقسیم کئے گئے۔
